回想自己被朋友的言行傷害多年後｢出聲｣，反被對方將所有責任推卸返去我身上，對方不願意反省或改善不特止，仲話係我過份敏感心靈脆弱，要改嗰個係我，並要求我繼續無條件無限量接受同包容佢以及其言行。即使同佢明言咗此等行為會令我唔舒服同受傷，佢都認為自己係｢無心｣、｢講笑｣同｢唔記得｣就唔需要改唔需要負責任，並表示｢我唔擔保我唔會再有呢d言行｣、「我記性好差，唔會記得自己有冇講過｣、｢我唔會為咗討好別人而迫自己去做d令自己唔開心嘅事｣…
你諗真d佢呢d說話嘅意思，其實係講緊｢你受傷你嘅事，但我保留傷害你嘅權利｣、｢要我尊重你，唔傷害你，會令我好唔開心，你唔可以迫我｣… 反映出佢唔尊重我，係一個選擇嚟，因為當你尊重同重視一個人，你係會好自然打從心底裡唔會有此等言行同態度，你唔需要刻意去｢記得｣或｢迫自己做｣，甚至覺得咁樣叫做｢要討好人｣同埋會因此覺得｢唔開心｣。
原本我只係攞其中反映到佢對我有呢個behavioural pattern嘅小事出嚟講，只提小事係為咗顧及佢面子同感受，最嚴重嗰d我已經唔提，包括當年佢借我同另一個朋友過橋去約自己暗戀嘅男仔出嚟，將件事包裝到係我哋失戀想識男仔，佢就好有朋友心咁幫我哋搞場｢speed dating｣式飯局介紹男仔畀我哋識，我知道佢背後動機又見佢desperate到咁樣，所以先同朋友夾埋一齊出席純粹為咗幫佢，但一直冇揭穿佢免得佢尷尬或老羞成怒，但飯局後佢竟然係打電話畀佢暗戀對象帶出嚟嘅另一位男性朋友(即係supposed係佢話想介紹畀我哋識嘅男仔)，不斷同對方講自己點樣畀前男友欺負，仲試圖約對方出街，我知道係因為呢個男仔喺飯局後就開始追求我，我係從對方口中得知… 呢件令我覺得佢好可怕，好表裡不一，成件事由一開始到佢決定打電話畀暗戀對象嘅朋友，都反覆地證明佢一直係為自己利益而利用朋友，而且食相難看…
呢件事我一直擺喺心十幾年冇講出嚟，冇同佢對質，同樣係因為唔想揭穿佢令到佢尷尬或老羞成怒，因為知道佢份人好玻璃心，唯有不斷同自己講件事未必係咁，叫自己唔好放喺心，甚至要｢感激｣佢介紹咗個男仔畀我識… 甚至久而久之，因為gaslight得自己太耐而懷疑自己記錯，懷疑佢利用朋友嘅行為係我自己幻想出嚟，懷疑自己怪錯咗佢，好彩嘅係當時涉事嘅仲有另一位朋友，可以證實確有此事發生過。
其實喺佢身邊，做佢朋友，一直係walk around eggshell，為咗照顧佢嘅感受而忽略自己感受，佢唔知其實心靈最脆弱嗰個係佢，我連揀事件嚟同佢｢對質｣都要揀最細微最無傷大雅最唔直接揭穿佢為人嘅事，我亦唔期望佢一下子可以聽入耳或改到，只係希望佢留意返自己嘅言行同動機，希望佢尊重返我，而我即使已經無法再說服自己佢呢d不斷重覆咗十幾廿年嘅言行係｢無心｣，但我仍然同自己講：｢或者佢真係唔知｣ … 但佢就以呢d只係小事為由，去話返我心靈脆弱，並將我嘅｢出聲｣，視為係我為咗令自己開心同自我感覺良好而對佢嘅刻意攻擊同傷害(fun fact: she’s accusing me of the exact thing she’s been doing to me)，視為我踐踏佢底線，佢嘅反應同回應，加上用一個又一個嘅大話去為自己掩飾同辯護，令我更肯定佢係完全唔想尊重我，更肯定佢唔係唔知、唔係無心，只係佢選擇要咁做 － She thinks she’s entitled to the “rights” to say and do whatever she wants, even if she knows it now (or already knew) that it hurts people… because it gives her power and you can’t take it away, because it makes her feel good and she doesn’t care if you feel bad.
當你表示如果雙方唔一齊去處理同解決呢個問題，咁呢段友情好難繼續落去，但佢同你講：｢This is me. 如果你接受唔到，我都冇辦法｣時，我終於都醒，我決定我唔會再啞忍，唔會再強迫自己接受，我決定walk away。
大半年之後，佢發覺我認真唔再理佢，唔再同佢做朋友，於是佢｢好有誠意｣咁同我｢道歉｣，由劈頭第一句話：｢生完仔就發現心靈脆弱起上嚟可以有幾脆。我估我之前都做咗好多無心嘅嘢，可能hurt咗你。響呢度同你道個歉先。｣，就已經睇到佢幾｢真誠地道歉｣，兜個圈去話你｢心靈脆弱｣，並強調自己｢無心｣…
之後佢都係為自己嘅言行解釋同辯護，唔單止講大話扭曲事實去試圖將自己嘅言行合理化，仲講咗一d我從來冇講過同做過嘅事出嚟，去｢證明｣我會因為好小事就唔高興同嬲佢，去｢證明｣我心靈脆弱同待人嚴苛，意指所有事都係我小器或誤解咗佢，話：｢如果你覺得我XXX，我都道個歉喇。｣，夾硬屈我覺得佢點點點，而且道歉得如此的勉為其難。
佢道歉嘅內容，講咗好多扭曲事實甚至冇發生過嘅事出嚟，搞到我真係有懷疑過係我精神錯亂記錯晒d嘢，好在因為佢喺解釋其中一件事時講咗一個好離譜嘅大話，令我意識到呢個唔係｢真誠道歉｣，只係講盡大話去繼續｢推卸責任｣，所以我先可以保持頭腦清晰，分清真假，冇再畀佢gaslight到，而且佢否認或扭曲嘅事件都有第三者在場，我問返人哋係證實到我個version先係正確，而且人哋都覺得佢言行過份。
經歷過呢一件事，我好同情同理解點解有d人會忍受一d不公嘅事情十幾廿年先出聲，就係因為唔想挑起衝突紛爭、唔想畀人覺得斤斤計較、唔想傷感情，一直be the bigger person去畀second chances人哋，畀benefit of the doubts人哋，總係覺得人係會成長會變好，總係覺得人性本善，唔會有人存心傷害人，何況係識於微時嘅朋友… 但我哋唔知道，包容就係幫兇，當一個人做任何事講任何嘢都冇consequences嘅時候，佢只會覺得唔尊重人甚至傷害人係冇問題、冇後果，然後佢只會變本加厲。
與其等待甚至要求別人改善同成長，其實最好嘅方法、亦係唯一正確嘅方法，就係自己改善同成長，遠離toxic嘅關係、人同事，做一個有底線有原則同尊重自己嘅人，You can’t ask people to respect you if you don’t respect yourself.
Keep Walking On 